काठमाडौं । सिटिजन्स बैंक इन्टरनेसनल गत आर्थिक वर्ष २०७९÷८० को नाफाबाट वितरणका लागि प्रस्ताव गरेको लाभांश पारित भएको छ । बैंकको शुक्रबार सम्पन्न साधारण सञ्चालक समितिबाट प्रस्तावित लाभांश पारित गरेको हो ।
साधारण सभाले गत आर्थिक वर्ष २०७९÷८० को नाफाबाट ५.७९ प्रतिशतका दरले हुन आउने ८२ करोड २१ लाख ६१ हजार ६५२ रुपैयाँबराबरको नगद लाभांश (लाभांश करसमेत) दिने प्रस्ताव सर्वसम्मतिबाट पारित गरेको छ ।
साधारणसभाबाट सञ्चालक समितिको वार्षिक प्रतिवेदन पनि पारित गरिएको छ । बैंकको लेखापरीक्षकको प्रतिवेदनसहित २०८० असार मसान्तको एनएफआरएसबमोजिम तयार गरिएको वासलात, आव २०७९÷८० को नाफा नोक्सानीको हिसाब तथा नगद प्रवाह विवरणलगायतका एकीकृत वित्तीय विवरण पनि सभामा छलफल भई स्वीकृत भएका छन् ।
साधारण सभाबाट प्रबलजंग पाण्डे, सीता कार्की (केसी), सजन शर्मा र दिग्विजय विष्ट बैंकको सञ्चालक समिति सदस्यमा निर्वाचित भएका छन् ।
सिटिजन्स बैंकले देशभर फैलिएका १८८ शाखा, १४८ एटीएम र ९७ शाखारहित बैंकिङ इकाइबाट १६ लाख ६२ हजार ग्राहकलाई आधुनिक बैंकिङ सेवा प्रदान गर्दै आएको छ । बैंकले विभिन्न किसिमका निक्षेप तथा कर्जा सुविधा, रेमिट्यान्स सेवा, आस्वा, ड्राफ्ट, भिसा डेबिट, क्रेडिट, प्रिभिलेज कार्ड सेवा, भिसा इन्टरनेसनल डलर कार्डलगायतका सेवा उपलब्ध गराउँदै आएको जानकारी दिईएको छ ।