काठमाडौं । चर्चित टिकटकर तथा आभूषण व्यवसायी तुलसा अधिकारी ठगी प्रकरणमा मुछिएकी छन् । ब्ल्याकमेलिङ गरेर करोडौँ ठगेको भन्दै जाहेरी परेपछि उनीविरुद्ध पक्राउ पुर्जीसमेत जारी भएको छ । सातदोबाटोस्थित ‘हाम्रो अटोमोबाइल्स’ का सञ्चालक कुमार चिमोरियाले तुलसामाथि सातदोबाटो प्रहरी वृत्तमा जाहेरी दिएका हुन् । साउन २४ गते परेको जाहेरीमाथिको अनुसन्धान लगभग अन्तिम चरणमा पुगेको प्रहरीले जनाएको छ । पक्राउ पुर्जी जारी भएपछि तुलसा भागेर चीन पुगेको सातदोबाटो प्रहरीको भनाइ छ । प्रहरी स्रोतका अनुसार तुलसाले आफूलाई ब्ल्याकमेलिङ गरेर साढे ४ करोड रुपैयाँ र ठूलो परिमाणमा ज्वैलरीसमेत लिएको चिमोरियाले आरोप लगाएका छन् । आपसी सम्बन्ध बिग्रिएपछि जबरजस्ती करणीमा फसाइदिने भनेर धम्क्याउँदै पटक पटक पैसा र गरगहना लिएको अनुसन्धानबाट देखिन्छ, प्रहरी स्रोतले भन्यो । तुलसामाथि सम्पत्ति शुद्धीकरण विभागमा पनि उजुरी परेको थियो । विभागले उक्त उजुरी पनि सातदोबाटो प्रहरीलाई फरवार्ड गरेपछि यसमा पनि अनुसन्धान सुरु भएको छ । अनुसन्धानबाट तुलसासँग अवैध सम्पत्ति रहेको आधारहरू देखिएको प्रहरीको दाबी छ । स्रोतले भन्यो, हाम्रो अनुसन्धानमा उहाँले अस्वाभाविक सम्पत्ति आर्जन गरेको देखिन्छ । २० करोडभन्दा बढीको ट्रान्जेक्सन र एक करोडभन्दा बढी बैंक ब्यालेन्स पाइएको छ । उहाँको कुल सम्पत्तिको हिसाब १६–१७ करोड हुन आउँछ । तुलसामाथि ठगी र अनुचित लेनदेनसँगै सम्पत्ति शुद्धीकरणको मुद्दा अदालत लैजाने तयारी प्रहरीले गरेको छ । अदालतमा मुद्दा दायर भएपश्चात् उनलाई इन्टरपोलमार्फत नेपाल झिकाउने प्रक्रिया प्रहरीले सुरु गर्ने छ । यता, तुलसाले भने चीनबाटै भिडिओहरू बनाएर आफूमाथि प्रहरीले बदनियत राखेको भन्दै न्यायको याचना गरेकी छन् । आफू नेपालमा छँदा प्रहरीले छलफलका लागि समेत नबोलाएको र चीन आएपछि मात्रै पक्राउ पुर्जीको बारेमा थाहा पाएको उनको दाबी छ । तुलसाले भनेकी छन्, म भदौ १९ गतेसम्म नेपालमै थिएँ । मलाई कुनै खोजखबर गरिएन । चीन आएपछि अन्य स्रोतबाट पक्राउ पुर्जी जारी भएको थाहा पाएँ । मेरो मान्छेहरू प्रहरीमा बुझ्न जाँदा उहाँहरूले जाहेरी नै देखाउन मान्नुभएन । पछि एक जना वकिल हायर गरेर मुद्दाको सामना गरिरहेको छु । तुलसाले अदालतमा मुद्दा दायर भएर छिटो किनारा लाग्ने अवस्था देखिएमा नेपाल फर्किन तयार रहेको बताएकी छन् । तर, प्रहरीले आफूलाई दुख दिने मात्रै नियत राखेको उनको गुनासो छ । आफ्नो सबै सम्पत्ति रोक्का गरिएको, तलासीका नाममा आफ्नो शोरुमबाट बहुमूल्य सामानहरू प्रहरीले जफत गरेर लगेको, आफू नजिकका मान्छेहरूलाई अनाहकमा दुःख दिइएको उनले बताएकी छन् । केही समयअघि छानबिन प्रयोजनका लागि कुमारीपाटीस्थित तुलसा कलेक्सनबाट सामानहरू बरामद गरेर लगिएको थियो । ती सामानहरू अहिले प्रहरीसँगै छन् । अदालतको आदेशअनुसार ती सामानको विषयमा निर्णय हुने प्रहरीको भनाइ छ । तुलसाले सातदोबाटो प्रहरी वृत्तकी प्रमुख डीएसपी पूर्णिमा चन्दलाई आरोपित गर्ने प्रयास गरेकी छन् । पूर्णिमाले आफ्नो पसलबाट विगतमा पटक–पटक गहनाहरू किनेर पैसा चुक्ता नगरेको उनको दाबी छ । आफूले पूरा पैसा नतिरीकन बिल दिन इन्कार गरेपश्चात् पूर्णिमा रुष्ट बनेको र अहिले आएर प्रतिशोध साँध्न खोजेको आरोप उनले लगाएकी छन् । यो मुद्दालाई नजिकबाट नियालेका प्रहरीका एक उच्च अधिकारीले भने यसलाई खण्डन गरे । तुलसासँग ३–४ वर्ष पहिले पूर्णिमाको सम्बन्ध रहेको र तीनपटक गरगहना खरिद गरेको भए पनि पैसा तिर्न बाँकी नरहेको ती अधिकारी बताउँछन् ।
‘पूर्णिमाले ३–४ वर्षअघि उहाँको पसलबाट सामानहरू अर्डर गर्ने र क्यूआरबाट भुक्तानी गर्ने गर्नुभएको देखिन्छ । अहिलेसम्म खरिद गर्नुभएको सामानको भुक्तानी भइसकेको छ । बिलमा अलिकति छुट माग्नु स्वाभाविकै हो, अन्यथा पैसा नतिर्ने नियत देखिएको छैन, उनले भने । पूर्णिमा करिब पाँच महिना अगाडि सातदोबाटो वृत्तमा सरुवा भएर आएकी हुन् । उनी आउँदा तुलसामाथि अनुसन्धान सुरु भइसकेको थियो । पूर्णिमाले अनुसन्धानलाई सही रूपमा निरन्तरता दिइरहेको दाबी प्रहरी स्रोतको छ । स्रोत भन्छ, तुलसाले टिकटकमा भिडिओहरू हालेर प्रहरीलाई बदनाम गर्ने प्रयास गरिरहनु भएको छ । यदि प्रहरीको काम(कारबाहीमा कुनै गुनासो भएमा विभिन्न निकायमा उजुरी दिन सक्नुहुन्थ्यो । तर, भिडिओ हालेर उहाँले पब्लिक सेन्टिमेन्ट बटुल्ने र प्रहरी अनुसन्धान प्रभावित पार्ने प्रयास गर्नुभएको छ । यसलाई हामीले गम्भीर रूपमा लिएका छौँ । तुलसा आफ्नो व्यवसायको सिलसिलामा चीन–नेपाल ओहोरदोहोर गरिराख्थिन् । आफू सुरुमा टुरिस्ट भिसामा चीन आएको र पछि त्यहाँ पनि व्यवसाय सुरु गरेको उनले बताएकी छन् । चीनमा २ लाख तिरेर कम्पनी दर्ता गरेको उनको भनाइ छ । एक छोरीकी आमा तुलसा हुन् । ललितपुरको भैंसेपाटीमा उनको घर छ । उनकी एक छोरी छन् । छोरीलाई अहिले आफूसँग चीनमा राखेर पढाइराखेकी छन् । नेपालमा आफूलाई बदनाम गर्न थालिएपछि छोरीलाई पनि चीन ल्याएर राख्नुपरेको उनको भनाइ छ । टिकटकमा विभिन्न विषयमा भिडिओहरू बनाएर तुलसा चर्चामा आएकी हुन् । सेलिब्रिटीका आपसी वादविवाद र सामाजिक इस्यूहरुमा उनी बोल्ने गर्छिन् । टिकटकमा उनका करिब तीन लाख फलोअर्स छन् ।