गत वर्ष प्रदर्शनमा आएको फिल्म बुलबुलबाट राष्ट्रिय अवार्ड र सार्क फिल्म फेस्टिवलमा उत्कृष्ट अभिनेत्रीको जुरी अवार्ड जितेकी अभिनेत्री स्वस्तिमा खड्कालाई गएको साउन ३० गते प्रदर्शनमा आएको फिल्म हजार जुनीसम्मले ठूलो धक्का दियो । यो फिल्म यस वर्षको सबैभन्दा ठूलो डिजास्टर सावित भएको छ । स्वस्तिमाको अभिनय खस्किएको भन्दै टिका–टिप्पणी पनि भयो ।
यो फिल्म हलमा प्रदर्शन भइरहँदा उनले फेसबुक स्टोरीमार्फत् नयाँ फिल्म साइन गरेको जानकारी दिएकी थिइन् । तर, उनले फिल्मको नाम लुकाएकी थिइन् । केही सञ्चारमाध्यमसँग कुराकानी गर्दै उनले एक फिल्मको सिक्वेल रहेको बताएकी थिइन् । अन्ततः उनको नयाँ फिल्मको नाम रिभिल भएको छ । स्वस्तिमाले चपली हाइटको तेस्रो सिरिजमा काम गर्न लागेकी हुन् ।

दीपेन्द्र के। खनाल निर्देशित यो फिल्मको पहिलो पार्ट बक्सअफिसमा सफल भएको थियो । अभिनेत्री विनिता बराललाई यही फिल्मले लोकप्रियता दिलाएको थियो । दोस्रो पार्टको निर्देशक पनि खनालले नै गरेका थिए तर फिल्म बक्सअफिसमा नराम्रोसँग पिटियो । निर्माता अर्जुन कुमार अब यसको तेस्रो पार्ट निर्माणमा जुटेका छन् । फिल्मको निर्देशन निकेश खड्काले गर्दैछन् ।
यसअघि निकेश र निर्माता अर्जुनबीच फिल्म ‘फाटेको जुत्ता’ मा टिमअप भएको थियो । ‘चपली हाइट ३’ मा अभिनेता सौगात मल्ल र अभिनेत्री सृष्टि श्रेष्ठ पनि फाइनल भइसकेका छन् । प्रतिक श्रेष्ठ, आमिर गौतमलगायतका कलाकारहरुको पनि अभिनय रहनेछ । सस्पेन्स थ्रिलर कथामा बन्ने फिल्मको दशैंपछि छायांकन सुरु हुँदैछ । निर्माण टिमले स्वस्तिमाको भूमिकाबारे खुलाएको छैन ।