काठमाडौं । नागढुंगा सुरुङमार्ग प्रयोग गर्ने सवारीसाधनबाट आजदेखि सडक उपभोग दस्तुर (टोल शुल्क) संकलन सुरु भएको छ। नागढुंगा सुरुङमार्ग निर्माण आयोजनाले सवारीसाधनको वर्ग र यात्राको दिशाअनुसार फरक–फरक शुल्क निर्धारण गरी टोल संकलन थालेको हो।

भौतिक पूर्वाधार विकास मन्त्रालयअन्तर्गतको विकास सहायता कार्यान्वयन महाशाखाले यसअघि नै सूचना जारी गर्दै आजदेखि सुरुङमार्ग प्रयोग गर्ने सवारीसाधनमा शुल्क लागू हुने जनाएको थियो। सडक बोर्ड नेपालको कार्यकारी समितिको निर्णय तथा नेपाल राजपत्रमा प्रकाशित सूचनाबमोजिम शुल्क प्रणाली कार्यान्वयनमा ल्याइएको हो।

नयाँ व्यवस्थाअनुसार सुरुङमार्ग प्रयोग गर्ने सवारीसाधनलाई चार वर्गमा विभाजन गरी शुल्क निर्धारण गरिएको छ। पहिलो वर्गमा पर्ने कार, भ्यान, पिकअप, ट्याक्टर, माइक्रोबस तथा अन्य हलुका सवारीसाधनले काठमाडौं प्रवेश गर्दा ६५ रुपैयाँ र काठमाडौंबाट बाहिरिँदा ६० रुपैयाँ तिर्नुपर्नेछ।

त्यस्तै, दोस्रो वर्गका मिनीबस तथा मिनी टिपर/ट्रकले काठमाडौं प्रवेश गर्दा ११५ रुपैयाँ र बाहिरिँदा ८० रुपैयाँ शुल्क बुझाउनुपर्नेछ। तेस्रो वर्गमा पर्ने बस तथा सिंगल रियर एक्सेल भएका ट्रकका लागि प्रवेश शुल्क २६० रुपैयाँ र बाहिरिने शुल्क २०० रुपैयाँ तोकिएको छ।

चौथो वर्गमा पर्ने मल्टी एक्सेल ट्रक, अन्य भारी सवारीसाधन तथा उपकरणले काठमाडौं प्रवेश गर्दा ६०० रुपैयाँ र बाहिरिँदा २५० रुपैयाँ तिर्नुपर्ने व्यवस्था गरिएको छ। यो वर्गमा प्रवेश र प्रस्थान शुल्कबीच सबैभन्दा ठूलो अन्तर रहेको छ।

सवारीसाधनको दिशाअनुसार शुल्क फरक राखिएको छ। विशेषगरी ठूला तथा मालवाहक सवारीसाधनका लागि काठमाडौं प्रवेश गर्दा लाग्ने शुल्क बाहिरिँदा लाग्ने शुल्कभन्दा बढी छ। हलुका सवारीसाधनको हकमा भने प्रवेश र प्रस्थान शुल्कको अन्तर पाँच रुपैयाँ मात्रै छ।

नागढुंगा–नौबिसे सडकखण्डमा हुने अत्यधिक सवारी चाप, घुमाउरो सडकका कारण यात्रुले भोग्दै आएको सास्ती तथा दुर्घटनाको जोखिम कम गर्ने उद्देश्यले सुरुङमार्ग निर्माण गरिएको हो।

सुरुङमार्ग प्रयोग गर्दा यात्रा समय र इन्धन बचत हुने अपेक्षा गरिएको छ। तर, टोल शुल्क लागू भएसँगै सवारीधनी, सार्वजनिक यातायात सञ्चालक तथा मालवाहक व्यवसायीले अब आफ्नो यात्रा र ढुवानी खर्चको हिसाब गर्दा सडक उपभोग दस्तुरलाई समेत समेट्नुपर्ने भएको छ।

नागढुंगा सुरुङमार्गको टोल शुल्क